जीममध्ये गेल्यावर ट्रेडमिलवर धावण्याला अनेकांची पसंती असते. आता हे ट्रेडमिल वापरताना त्याचे हॅंडल धरावं किंवा नाही, असा प्रश्न अनेकांना पडतो. प्रत्यक्षात ट्रेडमिलवर व्यायाम करताना हॅंडल धरणं योग्य नाही. हे हॅंडल फक्त तुमच्या सुरक्षेसाठी असतं. हॅंडल धरल्याने आपण खूप जोरात धावत आहोत, असं तुम्हाला वाटतं. शिवाय तुम्ही लवकर दमता.
हॅंडल धरल्यामुळे धावण्याचे, चालण्याचे लाभ मिळत नाहीत. तुम्ही खूप कमी कॅलरी खर्च करत, शरीराचं संतुलन साधू शकत नाही. तुमच्या हातांची हालचाल होत नाही. धावताना किंवा चालताना हातांची हालचाल होणं महत्त्वाचं असतं.
ट्रेडमिलची गती खूपच जास्त असेल तर हॅंडल धरल्याने तुम्ही पडू शकता. तुमच्या पायांवरचा ताण कमी होतो. पण शरीराच्या वरच्या भागावरचा ताण वाढतो.
याचा परिणाम शरीराच्या खालच्या भागाच्या कार्यक्षमतेवर होतो. त्यामुळे तुम्ही बाहेर जसे धावता तसंच ट्रेडमिलवर धावायला हवं.