आजकालच्या जीवनशैलीचा, कामाच्या स्वरुपाचा परिणाम आपल्या डोळ्यांवरही दिसू लागला आहे. त्यामुळे अनेकांना चश्‍मा असतो. पण अनेकदा लोक चश्‍माऐवजी कॉन्टॅक्‍ट लेन्सचा पर्याय निवडतात. यामुळे चश्‍म्याचा त्रास टाळता येत असला तरी इतर अनेक समस्या उद्‌भवू शकतात. लेन्स वापरताना डोळ्यांची योग्य ती स्वच्छता न राखल्यास डोळ्यांत इन्फेक्‍शनचा धोका वाढू शकतो. इन्फेक्‍शनपासून सुरक्षित राहण्यासाठी लेन्स लावण्यापूर्वी किंवा काढण्यापूर्वी हात स्वच्छ धुवावे. लेन्स सोल्यूशनने लेन्स स्वच्छ करा आणि मगच लावा.
लेन्स काढल्यानंतरही स्वच्छ करूनच लेन्स केसमध्ये ठेवा. तुम्हाला कॉन्टॅक्‍ट लेन्समुळे डोळे लाल होणे, खाज येणे, जळजळ होणे, अशा समस्या उद्‌भवत असतील तर त्याकडे दुर्लक्ष करू नका. डोळ्यांना लेन्स लावताना योग्य ती काळजी न घेतल्यास डोळ्यांच्या पापण्यांना सूज येऊ शकते. पापण्यांना सूज येत असल्यास लेन्स लावणे टाळा.
कॉन्टॅक्‍ट लेन्सच्या नियमित वापराने डोळे लाल होतात. ही सामान्य समस्या आहे असे समजून लोक त्याकडे दुर्लक्ष करतात. पण तुमची ही बेपर्वाई डोळ्यांसाठी घातक ठरते. कॉन्टॅक्‍ट लेन्सच्या वापराने डोळे कोरडे होतात. खरंतर सॉफ्ट व हार्ड कॉन्टॅक्‍ट लेन्स घातल्याने डोळ्यात अश्रूंची कमतरता निर्माण होते व डोळे कोरडे होऊ लागतात. कॉन्टॅक्‍ट लेन्स डोळ्यात असताना काही त्रास झाल्यास डोळे चोळू नका.