ऑफिसमध्ये असताना चहा किंवा कॉफी पिल्यामुळे काम करण्याची क्षमता वाढते असा बऱ्याच जणांचा समज आहे. त्यामुळे कामादरम्यान चहा किंवा कॉफी जास्त प्रमाणात पिणाऱ्यांची भरपूर संख्या आपल्याकडे आहे.
परंतु चहा, कॉफी पिल्याने काम करण्याची क्षमता वाढते हा समज चुकीचा आहे असे संशोधनात समोर आले आहे. कामाच्या ठिकाणी आपण ही कॉफी किती प्रमाणात पितो याचे बऱ्याचदा आपल्याला भान राहात नाही. तेव्हा हे अति प्रमाणात कॉफी पिणे शरीरासाठी घातक ठरू शकते.
कॉफी पिल्याने केवळ मानसिकता बदलते. वास्तविक काम करण्याची क्षमता वगैरे असे काहीही बदलत नाही याबद्दल जागरूक होणे आवश्यक आहे. यातही कामाचा ताण असताना कॉफी पिणे हे आणखीच घातक ठरू शकते. तणाव असताना कॉफी पिल्यास रक्तदाब वाढतो. याशिवाय आणखीही शारीरिक तक्रारी यामुळे उद्भवू शकतात. त्यामुळे सहकार्यांसोबत एकत्र मिळून कॉफी पिल्याने काम करण्याची उर्जा मिळते हे खरे असले तरी त्या कॉफीचे अतिसेवन होणार नाही याकडे मात्र जाणीवपूर्वक लक्ष देणे आवश्यक आहे.