[[{“value”:”
French Fries: फ्रेंच फ्राइज म्हटलं की लहानांपासून मोठ्यांपर्यंत अनेकांच्या चेहऱ्यावर हसू येतं. बर्गरसोबत, पार्टीमध्ये किंवा मूव्ही नाईटमध्ये फ्रेंच फ्राइज खाण्याची मजाच काही और असते. मात्र, घरी फ्राइज बनवताना त्या रेस्टॉरंटसारख्या कुरकुरीत होत नाहीत, अशी अनेकांची तक्रार असते. कधी त्या नरम पडतात, तर कधी जास्त तेल शोषून घेतात. पण काही सोप्या टिप्स आणि योग्य पद्धत वापरली, तर घरच्या घरीही अगदी बाजारासारख्या क्रिस्पी फ्रेंच फ्राइज बनवता येतात.
फ्रेंच फ्राइजसाठी काय साहित्य लागेल?
चार मोठे बटाटे, थंड पाणी, दोन चमचे कॉर्न फ्लोअर, चवीनुसार मीठ आणि तळण्यासाठी तेल लागेल. याशिवाय चवीनुसार काळी मिरी आणि चाट मसाला वापरू शकता.
बटाटे कापण्यापासून सुरुवात करा
फ्राइजसाठी स्टार्च जास्त असलेले मोठे बटाटे वापरणे चांगले. बटाटे सोलून त्यांचे लांब आणि समान आकाराचे तुकडे करा. सर्व फ्राइजची जाडी शक्यतो सारखी असावी. त्यामुळे त्या एकसारख्या शिजतात.
यानंतर कापलेले बटाटे ३० ते ६० मिनिटे थंड पाण्यात भिजत ठेवा. यामुळे बटाट्यावरील अतिरिक्त स्टार्च निघून जाण्यास मदत होते आणि फ्राइज अधिक कुरकुरीत होतात. भिजवल्यानंतर बटाटे पाण्यातून काढून स्वच्छ कापड किंवा टिश्यूच्या मदतीने पूर्णपणे कोरडे करा. बटाट्यांवर पाणी राहू देऊ नका.
कुरकुरीत फ्राइजसाठी डबल फ्राय ट्रिक
फ्रेंच फ्राइज कुरकुरीत करण्यासाठी दोन वेळा तळण्याची पद्धत उपयोगी ठरते. पहिल्यांदा तेल साधारण १५० ते १६० अंश सेल्सिअसपर्यंत गरम करा. त्यात बटाट्याच्या काड्या चार ते पाच मिनिटे हलक्या तळा. या वेळी फ्राइजचा रंग सोनेरी करण्याची गरज नाही.
पहिल्यांदा तळल्यानंतर फ्राइज बाहेर काढून १० ते १५ मिनिटे थंड होऊ द्या. त्यानंतर तेलाचे तापमान १८० ते १९० अंश सेल्सिअसपर्यंत वाढवा. आता फ्राइज पुन्हा तळा. दुसऱ्या फेरीत त्या सोनेरी आणि कुरकुरीत होतील.
फ्राइज तयार झाल्यानंतर त्या गरम असतानाच त्यावर मीठ, काळी मिरी किंवा चाट मसाला भुरभुरवा. त्यासोबत टोमॅटो केचप, चीज डिप, गार्लिक मेयो किंवा चिली सॉसही सर्व्ह करू शकता.
या चुका टाळा
बटाटे न भिजवता थेट तळणे, ओले बटाटे तेलात टाकणे, एकाच वेळी खूप फ्राइज तळणे आणि कमी तापमानावर तळणे टाळा. तसेच वारंवार वापरलेले तेल वापरणेही टाळावे.
फ्राइज अधिक चांगल्या होण्यासाठी तळण्याआधी बटाटे पूर्णपणे कोरडे असणे आणि तेलाचे तापमान योग्य ठेवणे महत्त्वाचे आहे. ही साधी डबल फ्राय पद्धत वापरून तुम्ही घरच्या घरी कुरकुरीत, सोनेरी आणि चविष्ट फ्रेंच फ्राइज बनवू शकता.
“}]]