लहान मुलं अनेकदा हट्ट करतात किंवा मोठयाने रडतात, अशावेळी त्यांचे पालक आपल्याकडील स्मार्टफोन काढून त्यांच्या हातात देतात आणि त्यांना गप्प करतात. आजकाल हे दृश्‍य आपल्याला हमखास दिसून येते, पण असे करणे योग्य नाही. एका संशोधनातून ही गोष्ट समोर आली आहे. अमेरिकेच्या बाल रोग अकादमीने याबाबत दिशा निर्देश लागू केले आहेत.
यानुसार, डिजिटल मीडियाचा जास्त वापर हा मुलांची झोप, त्यांचा विकास आणि शारीरिक स्वास्थ्य बिघडविण्यास कारणीभूत ठरु शकतो. संशोधकांचं म्हणणं आहे की, पालकांनी आपल्या चिमुकल्यांना स्मार्टफोन अथवा डिजिटल उपकरणं देणं टाळावं. अमेरिकेतील मिशिगन विद्यापीठाने केलेल्या एका संशोधनात अशाप्रकारची उपकरणे वापरल्याने मुलांमधील सहनशीलतेची भावना कमी होऊ शकते. असे म्हंटले आहे.
या संशोधनानुसार, डिजिटल मीडिया हा अनेक चिमुकल्यांचा शाळेपासूनच अनिवार्य भाग बनला आहे. पण त्यामुळे त्यांच्या बुद्धीविकासावर परिणाम होण्याची शक्‍यता आहे. लहानपणी मुलांच्या बुद्धीचा विकास हा वेगाने होतो. त्यामुळे या वयात त्यांना अशा उपकरणांपासून थोडं लांब ठेवणं हेच योग्य आहे.