[[{“value”:”
Bali Trip: इंडोनेशियातील बाली (Bali ) हे जगातील सर्वात सुंदर पर्यटनस्थळांपैकी एक मानले जाते. निळाशार समुद्र, स्वच्छ किनारे, हिरवागार निसर्ग, प्राचीन मंदिरे आणि आलिशान रिसॉर्ट्स यामुळे बालीला ‘पृथ्वीवरील स्वर्ग’ असेही म्हटले जाते. भारतीय पर्यटकांमध्येही बालीची लोकप्रियता मोठ्या प्रमाणात आहे. परदेशात फिरण्याचे स्वप्न कमी खर्चात पूर्ण करायचे असेल, तर बाली हा उत्तम पर्याय मानला जातो. मात्र, दोन जणांनी सहा दिवसांच्या बाली ट्रिपसाठी किती खर्च अपेक्षित आहे, हे जाणून घेणे महत्त्वाचे आहे. (Bali Trip)
बाली ट्रिपचे (Bali Trip)सर्वात मोठे बजेट फ्लाइट तिकिटावर खर्च होते. त्यामुळे प्रवासाचे नियोजन किमान दोन महिने आधी करणे फायदेशीर ठरते. आगाऊ तिकीट बुक केल्यास अनेकदा ऑफर्स आणि सवलती मिळतात. भारतातून बालीसाठी दोघांचे ये-जा (राऊंड ट्रिप) विमान तिकीट साधारण 45 हजार रुपयांपासून सुरू होते. मात्र, प्रवासाचा हंगाम, एअरलाईन आणि बुकिंगची वेळ यानुसार हा खर्च 70 हजार रुपयांपर्यंत जाऊ शकतो. (Bali Trip)
भारतीय नागरिकांसाठी बालीला जाणे तुलनेने सोपे आहे. कारण येथे ‘व्हिसा ऑन अरायव्हल’ची सुविधा उपलब्ध आहे. या व्हिसाच्या माध्यमातून भारतीय पर्यटकांना 30 दिवस बालीमध्ये राहता येते. एका व्यक्तीसाठी व्हिसा शुल्क 5 लाख इंडोनेशियन रुपिया (सुमारे 2,600 ते 2,800 रुपये) इतके आहे. त्यामुळे दोन जणांसाठी व्हिसाचा खर्च साधारण 5,200 ते 5,600 रुपयांपर्यंत होऊ शकतो. (Bali Trip)
राहण्याच्या खर्चाबाबतही बालीमध्ये विविध पर्याय उपलब्ध आहेत. कमी बजेटमध्ये प्रवास करणारे अनेक पर्यटक हॉस्टेलमध्ये राहणे पसंत करतात. त्यासाठी प्रतिदिन सुमारे 500 रुपयांपासून सुविधा मिळतात. मात्र, आरामदायी प्रवासासाठी कुटा, लेगियन किंवा उबुद या भागातील तीन-स्टार हॉटेल्स चांगला पर्याय ठरतात. अशा हॉटेलचे दर प्रतिरात्र 2,500 ते 4,000 रुपयांदरम्यान असतात. सहा दिवसांच्या मुक्कामासाठी सुमारे 24 हजार रुपयांचा खर्च अपेक्षित धरावा. (Bali Trip)
बालीमध्ये जेवणही तुलनेने परवडणाऱ्या दरात मिळते. दोन जणांच्या एका दिवसाच्या जेवणासाठी साधारण 800 ते 1,200 रुपये खर्च येतो. जर तुम्ही मोठ्या किंवा आलिशान रेस्टॉरंटमध्ये जेवण केले, तर खर्च वाढू शकतो. सहा दिवसांसाठी दोघांच्या जेवणाचा खर्च साधारण 10 ते 15 हजार रुपयांपर्यंत जाऊ शकतो. विशेष म्हणजे बालीमध्ये भारतीय खाद्यपदार्थ देणारी अनेक रेस्टॉरंट्सही उपलब्ध आहेत.
स्थानिक प्रवासासाठी स्कूटर भाड्याने घेणे हा सर्वात लोकप्रिय आणि स्वस्त पर्याय आहे. स्कूटरचे भाडे दिवसाला साधारण 350 ते 700 रुपये असते. जर टॅक्सी किंवा खासगी कॅबचा वापर केला, तर दिवसाचा खर्च 3,000 ते 4,500 रुपयांपर्यंत जाऊ शकतो.
बालीमध्ये फिरण्यासाठी अनेक आकर्षक ठिकाणे आहेत. नुसा पेनिडा डे ट्रिप, बाली स्विंग, वॉटर स्पोर्ट्स, माउंट बातूर सनराईज ट्रेक आणि विविध प्राचीन मंदिरे पर्यटकांमध्ये विशेष लोकप्रिय आहेत. काही मंदिरांचे प्रवेश शुल्क कमी असले तरी साहसी उपक्रम आणि विशेष टूरसाठी अतिरिक्त खर्च करावा लागतो.
एकूणच, दोन जणांनी सहा दिवसांची बाली ट्रिप बजेटमध्ये करायची असल्यास सुमारे 90 हजार ते 1 लाख रुपयांचा खर्च अपेक्षित असतो. मात्र, फ्लाइट ऑफर्स, स्वस्त हॉटेल्स आणि योग्य नियोजन केल्यास हा खर्च काही प्रमाणात कमी करता येऊ शकतो. त्यामुळे आगाऊ नियोजन केल्यास कमी खर्चात अविस्मरणीय परदेश प्रवासाचा आनंद घेता येईल.
“}]]