शस्त्रक्रिया न करताही यकृत कर्करोगावर उपचार करता येणार

[[{“value”:”

नवी दिल्ली : कर्करोगाचा आजार वाढत चाललाआहे. गेल्या दीड दशकात दिल्लीत कर्करोगाने होणाऱ्या मृत्यूंच्या दुप्पट वाढ झाल्याचे अलीकडील जन्म आणि मृत्यू नोंदणी अहवालातून समोर आले आहे. त्यामुळे गेल्या वर्षी दिल्लीत कर्करोगाने मृत्यूमुखी पडलेल्यांची संख्या आठ हजारांच्या आसपास पोहोचली.

पोटाशी संबंधित कर्करोग हे दिल्लीत मृत्यूचे प्रमुख कारण बनत आहे. नुकतीच इन्स्टिट्यूट ऑफ लिव्हर अँड बिलीरी सायन्सेस येथे यकृताच्या कर्करोगाच्या आजारासंदर्भात एक परिषदही झाली. या पार्श्वभूमीवर एका प्रख्यात माध्यमाच्या प्रतिनिधींनी आयएलबीएसचे संचालक डॉ. एसके सरीन यांच्याशी चर्चा केली. त्यातून काही नवीन माहिती समोर आली असून ती त्यांनी वाचकांना दिलासा देण्यासाठी प्रसिध्द केली आहे.

सध्या, यकृताचा कर्करोग हा सर्वात वेगाने वाढणारा कर्करोग आहे. जगभरात कर्करोगाने होणाऱ्या मृत्यूचे ते तिसरे प्रमुख कारण बनत आहे. भारतातही यकृताचा कर्करोग झपाट्याने वाढत आहे. बहुतेक रुग्ण प्रगत अवस्थेत म्हणजे खूप उशीरा उपचारासाठी पोहोचतात. त्यामुळे यकृताच्या कर्करोगाबाबत लोकांमध्ये जागृती होणे गरजेचे आहे. जेणेकरून रोग लवकर ओळखता येईल. रोग लवकर ओळखल्यास उपचार अधिक चांगले होऊ शकतात असे त्यांनी नमूद केले.

हिपॅटायटीस बी आणि हिपॅटायटीस सी हे यकृताच्या कर्करोगाचे प्रमुख कारण आहेत. आता असे दिसून येत आहे की नॉन-अल्कोहोलिक फॅटी लिव्हर आणि अल्कोहोलचे सेवन देखील या आजाराची प्रमुख कारणे बनत आहेत. तो चिंतेचा विषय आहे. देशातील सुमारे एक तृतीयांश लोकांना आणि दिल्लीतील सुमारे 50 टक्के लोकांना नॉन-अल्कोहोलिक फॅटी लिव्हरची समस्या आहे. त्यामुळे लोकांना त्यांच्या आहाराकडे लक्ष द्यावे लागेल आणि दररोज व्यायामासाठी वेळ काढावा लागेल. या लोकांनी आरोग्य तपासणी देखील करावी.

जे लोक अल्कोहोल पीत नाहीत त्यांच्यामध्ये फॅटी लिव्हर कशामुळे होते? याला उत्तर देताना सरीन म्हणाले, फॅटी लिव्हर ही गंभीर बाब आहे. याची अनेक कारणे आहेत.आहारात जंक फूड आणि फॅटचा अतिरेकी वापर वाढला आहे. लोक आता शारीरिक कष्ट करत नाहीत. त्यामुळे शारीरिक हालचाली खूप कमी झाल्या आहेत. याशिवाय काही अनुवांशिक कारणे देखील आहेत, ज्यामुळे फॅटी लिव्हरची समस्या उद्भवते.

गेल्या काही वर्षांत यकृताच्या कर्करोगाच्या उपचारासाठी नवीन पर्याय आणि औषधे उदयास आली आहेत. याच्या मदतीने यकृताच्या कर्करोगाच्या प्रगत अवस्थेतील रुग्णांनाही दीर्घ कालावधीसाठी वाचवता येते. पूर्वी, यकृताच्या कर्करोगाच्या उपचारांसाठी शस्त्रक्रिया हा मुख्य पर्याय होता. विशेषत: गाठ थोडी मोठी असेल तर शस्त्रक्रिया करावी लागायची. आता नवीन तंत्रज्ञान आणि औषधे आली आहेत, ज्यामुळे शस्त्रक्रिया न करताही उपचार शक्य आहेत. इम्युनोथेरपीची औषधेही आली आहेत. केमोचे अधिक दुष्परिणाम होतात. इम्युनोथेरपी औषधांचे परिणाम चांगले दिसत आहेत.

The post शस्त्रक्रिया न करताही यकृत कर्करोगावर उपचार करता येणार appeared first on Dainik Prabhat.

“}]]