मासिक पाळी हे मातृत्वाचे सूचक असते. महिलांच्या शरीरात दर महिन्याला घडणारी ही नैसर्गिक क्रिया तुम्ही आई बनण्यास सक्षम आहात याचे सूचक आहे. मात्र, समाजात पीरियड्‌सबद्दल पसरलेल्या समज आणि गोंधळामुळे “मासिक पाळीतील स्वच्छता’ हा अतिशय गंभीर विषय बनला आहे. आरोग्य तज्ज्ञांच्या मते, मासिक पाळीच्या काळात स्वच्छतेची विशेष काळजी घेणे आवश्‍यक आहे, त्यात कोणत्याही प्रकारचे दुर्लक्ष तुमच्यासाठी समस्या वाढवू शकते. याविषयी जनजागृती करण्यासाठी या वर्षीची थीम’ 2030 पर्यंत मासिक पाळी जीवनातील एक सामान्य वस्तुस्थिती बनवा’ ही आहे.
आरोग्य तज्ज्ञांच्या मते, लहानपणापासूनच मासिक पाळी आणि त्याच्याशी संबंधित स्वच्छतेच्या उपायांबद्दल लोकांना योग्य माहिती सांगणे खूप महत्त्वाचे आहे. अस्वच्छतेमुळे गुप्तांगाला खाज सुटणे, मूत्रमार्गात संक्रमण (यूटीआय) आणि गंभीर प्रकरणांमध्ये, मूत्रपिंडाच्या समस्यांचा धोका वाढू शकतो. या सर्व समस्या टाळण्यासाठी काही सोप्या गोष्टींची काळजी घेणे तुमच्यासाठी उपयुक्‍त ठरू शकते.
मासिक पाळीच्या काळात शरीरातून अस्वच्छ रक्‍त बाहेर येते, जे सॅनिटरी नॅपकिनद्वारे शोषले जाते. या दरम्यान, शरीर अनेक प्रकारच्या संक्रमणांसाठी खूप संवेदनशील बनते. अशा परिस्थितीत एकच पॅड जास्त वेळ वापरल्याने जननेंद्रियाच्या संसर्गाचा धोका वाढतो. या समस्या टाळण्यासाठी सॅनिटरी नॅपकिन वेळोवेळी बदला. आरोग्य तज्ज्ञांच्या मते, मासिक पाळीच्या काळात स्वच्छतेची काळजी घेत दर 3-4 तासांनी पॅड बदला.
गुप्तांगाच्या स्वच्छतेची काळजी घ्या
मासिक पाळीच्या दरम्यान गुप्तांगांची स्वच्छता खूप महत्त्वाची बनते, असे केल्याने तुम्ही संसर्गाचा धोका कमी करू शकता. सॅनिटरी नॅपकिन काढल्यानंतरही बॅक्‍टेरिया शरीरात चिकटू शकतात. बहुतेक लोक गुप्तांग स्वच्छ करण्यासाठी रसायनयुक्‍त उत्पादने वापरत राहतात, मात्र तज्ज्ञ हे योग्य मार्ग मानत नाहीत. प्रत्येक वेळी स्वच्छ पाण्याने गुप्तांग पूर्णपणे स्वच्छ करा.
सॅनिटरी नॅपकिन्सची योग्य विल्हेवाट
प्रत्येक वेळी पॅड वापरताना, त्याची योग्य प्रकारे विल्हेवाट लावणे आवश्‍यक आहे. सॅनिटरी नॅपकिन पेपरमध्ये व्यवस्थित गुंडाळून डस्टबिनमध्ये टाका आणि नंतर हात स्वच्छ करायला विसरू नका. वापरलेले सॅनिटरी नॅपकिन उघड्यावर फेकल्याने जंतू आणि रोगांचा प्रसार होऊ शकतो. टॉयलेटमध्ये नॅपकिन्स फ्लश करू नका.
पाणी पिणे फार महत्त्वाचे
आरोग्य तज्ज्ञांच्या मते, मासिक पाळीच्या दरम्यान तुमची पीएच पातळी देखील वाढू शकते, ते नियंत्रणात ठेवण्यासाठी वेळोवेळी पाणी पिणे फार महत्त्वाचे मानले जाते. पाणी पिण्याने संसर्ग होण्याचा धोका देखील कमी होतो, तसेच डिहायड्रेशनपासून तुमचे संरक्षण होते.