विद्या बालनने आतापर्यंतच्या करिअरमध्ये अगदी वेगळ्या प्रकारचे रोल केले आहेत. चाकोरीबद्ध भूमिका आपण स्वतःहून नाकारल्या नाहीत. तर ज्या भूमिका आपल्याला मिळत गेल्या त्या आपण स्वीकारत गेल्याचे विद्याने सांगितले आहे.
ही चर्चा सुरू व्हायचे कारण म्हणजे विद्याचा “शेरनी’ थोड्याच दिवसात येणार आहे. त्यामध्ये विद्या चक्क वनरक्षक अधिकाऱ्याच्या भूमिकेत दिसणार आहे. तिच्या आतापर्यंतच्या भूमिकेतील ही सर्वात जास्त आव्हानात्मक भूमिका असणार आहे.
आपल्या व्यक्तिमत्त्वाच्या आधारे होत असलेल्या टीकेला विद्याने जोरदार उत्तर दिले आहे.
“ज्यांना वाटते की मी छोटी आहे, मोठी आहे, बोल्ड आहे अथवा बेशरम आहे किंवा समजूतदार आहे, त्यांना मी सांगू इच्छिते की मी स्वतःला बदलू शकत नाही.
मी जशी आहे तशीच राहणार आहे. त्यात बदल होणार नाही. मी केवळ स्वतःचा रस्ता निवडू शकते.’ असे विद्याने म्हटले आहे. विद्याने “परिणिता’मधून आपल्या करिअरला सुरुवात केली आणि पुढे “डर्टी पिक्चर’ सारखा बोल्ड रोल देखील केला आहे. “पा ‘,”कहानी’, “इश्किया’, “मिशन मंगल’, “तुम्हारी सुलु’ आणि “शकुंतला देवी’मधील तिचे काम प्रेक्षकांना खूप आवडले आहे.