मुंबई – राज्यात बी. ए. 4 आणि बी. ए. 5 या ओमायक्रॉनच्या नव्या व्हेरिंटचे रूग्ण आढळल्याची माहिती राज्याच्या आरोग्य विभागाच्या अधिकाऱ्यांच्या हवाल्याने देण्यात आली आहे. यातील पहिल्या व्हेरिएंटचे 4 तर दुसऱ्याचे तीन रूग्ण आढळून आले आहेत. विशेष म्हणजे हे सातही रूग्ण पुण्यातील आहेत. या सगळ्यांवर यशस्वी उपचार करण्यात आले आहेत.
या सातही रूग्णांना सौम्य लक्षणे असून त्यांच्यावर घरीच उपचार केले जात असल्याची माहितीही देण्यात आली आहे. दक्षिण आफ्रिका आणि जगाच्या अन्य भागात हे व्हेरिएंट आढळून आले होते. मात्र महाराष्ट्रात प्रथमच त्याच्या रूग्णांची नोंद झाली आहे. नव्या व्हेरिएंटची लागण झालेल्या 7 जणांपैकी चार पुरूष आणि तीन महिला आहेत.
यातील चौघांचे वय 50 पेक्षा जास्त आहे, तर दोन जण 20 ते 40 वयोगटातील आहेत. सातवा रूग्ण एक 9 वर्षांचा मुलगा आहे. यातील सहा जणांना लसीचे दोन्ही डोस देण्यात आले होते, तर एका रूग्णाने बूस्टरही घेतला होता. सौम्य लक्षणे असणाऱ्या या सर्व रूग्णांवर त्यांच्या घरीच यशस्वी उपचार करण्यात आल्याची माहिती देण्यात आली.
4 ते 18 मे दरम्यान, या सगळ्यांचे नमूने घेण्यात आले होते. यातील दोघांनी दक्षिण आफ्रिका आणि बेल्जीयमचा प्रवास केला होता, तर अन्य दोघांनी केरळ आणि कर्नाटकला भेट दिली होती. इतर दोघांनी अलिकडच्या काळात कोठे प्रवास केला नव्हता.