ओप्पोच्या (Oppo) फोल्डेबल फोनबद्दल सतत लीक रिपोर्ट्स येत होत्या, मात्र आता कंपनीने याची पुष्टी केली आहे. 15 डिसेंबर रोजी होणाऱ्या कार्यक्रमात ओप्पो फाईंड एन (Oppo Find N) लाँच केला जाईल.
Oppo Find N हा कंपनीचा पहिला फोल्डेबल स्मार्टफोन असेल. Oppo Find N साठी कंपनी गेली चार वर्षे संशोधन करत आहे. अधिकृत टीझरनुसार, Oppo Find N चे डिझाईन Samsung Galaxy Z Fold सीरीज सारखे असेल.
ओप्पोचे मुख्य उत्पादन अधिकारी आणि वनप्लसचे संस्थापक पिट लाऊ यांनी एका खुल्या पत्राद्वारे ओप्पो फाइंड एन लॉन्च केल्याची पुष्टी केली आहे. Oppo Find N मेटल फिनिशसह उपलब्ध असेल आणि दोन भिन्न OLED डिस्प्ले उपलब्ध असतील.
पिट लाऊ यांनी त्यांच्या पत्रात म्हटले आहे की, या फोनमध्ये आम्ही मागील फोल्डेबल स्मार्टफोनच्या डिस्प्लेवरील क्रीज आणि फोनच्या एकूण गुणवत्तेसह येणाऱ्या समस्यांचे निराकरण करण्याचा प्रयत्न केला आहे. Oppo ने ट्विटरवर 15 सेकंदाचा टीझर व्हिडिओ देखील शेअर केला आहे.
टीझरनुसार, Oppo Find N सह एक अंडर डिस्प्ले कॅमेरा उपलब्ध असेल. फोनची रचना मुख्यत्वे Samsung Galaxy Fold सारखीच आहे. टीझरनुसार, फोन यूएसबी टाइप-सी पोर्ट आणि साइड-माउंट फिंगरप्रिंट सेन्सरसह लॉन्च केला जाईल.
Oppo चा वार्षिक कार्यक्रम 14 डिसेंबरपासून सुरू होत आहे, जो आभासी असेल. Oppo चा हा Oppo Inno Day 2021 इव्हेंट चीनच्या शेनझेन शहरात 14-15 डिसेंबर रोजी होणार आहे. हा कार्यक्रम 14 डिसेंबर रोजी दुपारी 1.30 वाजता सुरू होईल.
कंपनीच्या वेबसाइटला भेट देऊन अभ्यागत कार्यक्रमासाठी नोंदणी करू शकतात. काही दिवसांपूर्वी फोल्डेबल फोनसाठी चीन सरकारकडून मिळालेल्या प्रमाणपत्राचे चित्रही समोर आले आहे. Oppo च्या फोल्डेबल फोनला “PEUM00” असे कोडनेम आहे.